Rutas:
Con estas rutas preténdese dar a coñecer a flora, a fauna e a importancia da auga na vida do parque natural, así como tamén a súa historia e as súas características etnográficas e arqueolóxicas. Todas as rutas serán guiadas por monitores e, previamente ao seu inicio, proxectarase un diaporama sobre o parque.

a) Ruta do Rego da Pedra
Cunha lonxitude de 3.000 metros, discorre paralela a un antigo rego de pedra. Antes de chegar ao seu termo, percórrese a Senda Botánica, ilustrada con paneis explicativos da vexetación do parque. Ten unha duración aproximada de dúas a tres horas.

b) Ruta de Cabaciñas – Poza de Cabanas
Esta ruta de 1.800 metros comeza ascendendo ao miradoiro de Cabaciñas, para desde alí volver polo regato Cabanas ata a poza do mesmo nome. Dura aproximadamente entre unha hora e media e dúas.

c) Ruta do Castro Alto dos Cubos
É unha ruta lineal de 2.500 metros de lonxitude que, partindo de Frinxo, chega ata as escavacións do Castro Alto dos Cubos. A duración aproximada é de dúas a tres horas.

d) Ruta dos Muíños de Tripes
Con 2.800 metros de lonxitude, ascende esta ruta paralela ao río Tripes, pasando polos muíños restaurados da zona alta, para logo descender polo bosque ata o punto de partida.

e) Ruta dos Muíños de Paredes
Con 9.000 metros de lonxitude, ten o seu inicio no Centro de Interpretación e remata no lugar de Paredes, para volver ao punto de partida.

f) Senda Botánica
Ruta que se desenvolve por un percorrido de 400 metros de lonxitude polo arboreto ilustrado do parque natural, identificando as especies a través de xogos.